TT Ads

టీమిండియా యువ ఫాస్ట్ బౌలర్ ప్రసీద్ కృష్ణ అరంగేట్రంవన్డేలోనే 24 ఏళ్ల నాటి రికార్డ్‌ని బ్రేక్ చేశాడు. ఇంగ్లాండ్‌తో పుణె వేదికగా మంగళవారం రాత్రి ముగిసిన తొలి వన్డేతో భారత్ జట్టులోకి ఎంట్రీ ఇచ్చిన పాతికేళ్ల ప్రసీద్ కృష్ణ.. మ్యాచ్‌ని మలుపు తిప్పే బౌలింగ్ ప్రదర్శన కనబర్చాడు. మ్యాచ్‌లో మొత్తం 8.1 ఓవర్లు బౌలింగ్ చేసిన ఈ పేసర్ 54 పరుగులిచ్చి 4 వికెట్లు పడగొట్టాడు. అరంగేట్రం వన్డేలో ఇప్పటి వరకూ ఏ భారత బౌలర్ కూడా నాలుగు వికెట్ల మార్క్‌ని అందుకోలేదు.

భారత్ తరఫున అరంగేట్రం వన్డేలో అత్యధిక వికెట్లు పడగొట్టిన బౌలర్ల జాబితాని పరిశీలిస్తే..? 1997లో వెస్టిండీస్‌పై నోయల్ డేవిడ్ 3/21తో ఇప్పటి వరకూ టాప్‌లో ఉండగా.. అతని తర్వాత స్థానాల్లో వరుణ్ అరోణ్ (3/24), హార్దిక్ పాండ్యా (3/31), పీయూస్ చావ్లా (3/37) తదితర క్రికెటర్లు ఉన్నారు. దాంతో.. మంగళవారం రాత్రి పుణెలో ఇంగ్లాండ్‌పై 4/54తో రాణించిన ప్రసీద్ కృష్ణ.. నోయల్ డేవిడ్‌ని వెనక్కి నెట్టి నెం.1 స్థానానికి ఎగబాకాడు. దాదాపు 24 ఏళ్ల పాటు నోయల్ డేవిడ్ అగ్రస్థానంలో ఉండటం గమనార్హం.

తొలి వన్డేలో ఫస్ట్ బ్యాటింగ్ చేసిన భారత్ 5 వికెట్ల నష్టానికి 317 పరుగులు చేయగా.. లక్ష్య ఛేదనలో ఇంగ్లాండ్ 14.2 ఓవర్లలోనే 135 పరుగులతో మెరుగైన స్థితిలో నిలిచింది. కానీ.. ఈ దశలో జేసన్ రాయ్‌ని ఔట్ చేసిన ప్రసీద్ కృష్ణ.. ఆ తర్వాత ఓవర్‌లో బెన్‌స్టోక్స్‌(1)ని బోల్తా కొట్టించాడు. అనంతరం కొద్దిసేపటికే శామ్ బిల్లింగ్స్ (12), టామ్ కరన్ (11)ని కూడా ప్రసీద్ కృష్ణ ఔట్ చేసేశాడు. దాంతో.. ఇంగ్లాండ్ 42.1 ఓవర్లలోనే 251 పరుగులకి ఆలౌటైంది.

TT Ads

Leave a Reply

Your email address will not be published. Required fields are marked *